೧. ಮಾತಿನ ಬೆಲೆ ತಿಳಿದವರು
ಮೊದಲು ಹೃದಯದ ತಕ್ಕಡಿಯಲ್ಲಿ ತೂಗಿ
ನಂತರ ಮಾತನಾಡುತ್ತಾರೆ.
ಆದರೆ ಮಾತಿನ ಬೆಲೆ ತಿಳಿಯದವರು
ಮೊದಲು ಮಾತನಾಡಿ ನಂತರ
ಹೃದಯದ ತಕ್ಕಡಿಯಲ್ಲಿ ತೂಗಿ
ತಾವೂ ನೊಂದು ಬೇರೆಯವರನ್ನು ನೋಯಿಸುತ್ತಾರೆ.
೨. ಇರುವುದೆಲ್ಲವನ್ನು ಉಳಿಸಿಕೊಳ್ಳಲು ಸಾಧ್ಯವಿಲ್ಲ,
ಕಳಕೊಂಡ ಎಲ್ಲವನ್ನೂ ಪಡೆಯಲೂ ಸಾಧ್ಯವಿಲ್ಲ,
ಪಡೆದುಕೊಂಡ ಎಲ್ಲವನ್ನೂ ಕೊಡಲೂ ಸಾಧ್ಯವಿಲ್ಲ,
ಅಂದುಕೊಂಡದ್ದೆಲ್ಲವನ್ನು ಮಾಡಲೂ ಸಾಧ್ಯವಿಲ್ಲ,
ಸಾಧಿಸಿದ್ದೆಲ್ಲವನ್ನು ತೋರಿಸಲೂ ಸಾಧ್ಯವಿಲ್ಲ,
ಈ ಎಲ್ಲಾ ಸಾಧ್ಯವಿಲ್ಲಗಳ ನಡುವೆ ಸಾಧ್ಯವಿರುವುದು ಕೆಲವು,
ಅದೇ "ಪ್ರೀತಿ, ವಿಶ್ವಾಸ, ಸ್ನೇಹ, ನಂಬಿಕೆ ಮತ್ತು ಸಂಬಂಧ"
ಇದನ್ನು ಉಳಿಸಿಕೊಂಡು ಹೋಗುವುದೇ ಜೀವನ.
೩. ಸಮಯ, ಅಧಿಕಾರ, ಹಣ ಮತ್ತು ಶರೀರ ನಮಗೆ ಜೀವನದ ಎಲ್ಲಾ ಸಮಯಗಳಲ್ಲೂ ಸಹಕರಿಸುವುದಿಲ್ಲ. ಆದರೆ ಒಳ್ಳೆಯ ನಡತೆ, ಒಳ್ಳೆಯ ತಿಳುವಳಿಕೆ, ಒಳ್ಳೆಯ ಮನಸ್ಸುಗಳು ನಮಗೆ ಯಾವಾಗಲೂ ಸಹಕರಿಸುತ್ತವೆ.
೪. ಸತ್ಯನಿಷ್ಠೆ, ಪವಿತ್ರತೆ ಮತ್ತು ನಿಸ್ವಾರ್ಥತೆ ಇವು ಯಾರಲ್ಲಿರುತ್ತದೆಯೋ ಅವರನ್ನು ಈ ಜಗತ್ತಿನ ಯಾವ ಶಕ್ತಿಯೂ ನಿಗ್ರಹಿಸಲಾರದು. ಇವುಗಳಿಂದ ಸಂಪನ್ನನಾದವನು ಇಡೀ ಜಗತ್ತಿನ ವಿರೋಧವನ್ನೇ ಎದುರಿಸಬಲ್ಲ.
೫. ಶಸ್ತ್ರ ಮತ್ತು ಶಾಸ್ತ್ರ ಇವೆರಡಕ್ಕೆ ಇರುವ ವ್ಯತ್ಯಾಸ....
ಶಸ್ತ್ರ ಬದುಕನ್ನು ಕೊನೆಗೊಳಿಸುತ್ತದೆ ಶಾಸ್ತ್ರ ಬದುಕನ್ನು ನಿರೂಪಿಸುತ್ತದೆ.
೬ ಗೆಲ್ಲಲೇಬೇಕೆಂಬ ಹಠವಿರಬಾರದು.
ಪ್ರಯತ್ನಿಸಿ ಸೋತರೂ ಸರಿಯೇ.
ನಾವು ನಡೆವ ಮಾರ್ಗವನ್ನು
ನಮ್ಮ ಅಂತರಾತ್ಮ ಒಪ್ಪಿದರೆ ಸಾಕು.
ಹಿಯಾಳಿಸುವ ಮಾತಿಗೆ ಕಿವಿಕೊಡಬಾರದು ಅಷ್ಟೇ.
೭. ತಿಳಿಯಬೇಕಾದ್ದದು ಸಮುದ್ರದಷ್ಟು,
ತಿಳಿದಿರುವುದು ಹನಿಯಷ್ಟು.
ಮಾತುಗಳನ್ನು ಎಣಿಸಿ ನೋಡಬಾರದು,
ತೂಕ ಮಾಡಿ ನೋಡಬೇಕು.
ಹಸಿವು ಚೆನ್ನಾಗಿದ್ದರೆ ಊಟ ಚೆನ್ನಾಗಿಯೇ ಇರುತ್ತದೆ.
೮. ನದಿಯಿಂದ ಪ್ರತಿಯೊಬ್ಬರೂ ನೀರನ್ನು ತೆಗೆದುಕೊಂಡು ಹೋದರೂ...
ಅದೇನು ಬತ್ತಿ ಹೋಗುವುದಿಲ್ಲ. ಮೊದಲಿಗಿಂತ ರಭಸವಾಗಿ ಹರಿಯುತ್ತದೆ.
ಬೇರೆಯವರಿಗೆ ಸಹಾಯ ಮಾಡುವುದರಿಂದ ನಾವೇನೂ ಖಾಲಿ ಆಗುವುದಿಲ್ಲ.
ಮೊದಲಿಗಿಂತ ಹೆಚ್ಚು ಬಲಿಷ್ಠವಾಗುತ್ತೇವೆ.
೯. ಜೇಬು ಖಾಲಿಯಾದಾಗ, ಎದುರಾಗುವ ಒಂದೊಂದು ತಿರುವು ಕೂಡಾ
ಒಂದೊಂದು ಪಾಠವನ್ನು ಹೇಳಿಕೊಡುತ್ತದೆ.
ಆದರೆ ಜೇಬು ತುಂಬಿದಾಗ ಎದುರಾಗುವ
ಪ್ರತಿಯೊಂದು ತಿರುವು ಕೂಡಾ ನಮ್ಮನ್ನು
ದಾರಿ ತಪ್ಪುವಂತೆ ಮಾಡುತ್ತದೆ.
೧೦. ಕೆಲವೇ ತಪ್ಪುಗಳಿಗಾಗಿ ಒಂದು ಉತ್ತಮ ಸಂಬಂಧ ಮುರಿದುಕೊಳ್ಳಬೇಡಿ.
ಏಕೆಂದರೆ ಪರಿಪೂರ್ಣತ್ವ ಕೇವಲ ತತ್ವ ಮಾತ್ರ.
ಇದರ ಜೊತೆಗೆ ನಾನು ಸರಿಯಾಗಿದ್ದೇನೆ ಎಂಬುದೂ ಭ್ರಮೆ.
ಹೀಗಾಗಿ ತಪ್ಪುಗಳನ್ನು ಮನ್ನಿಸಿ ಸಂಬಂಧ ಉಳಿಸಿಕೊಳ್ಳಿ.
೧೧. ಮನುಷ್ಯ ಮಾಡಿದ ಅತ್ಯಂತ ಕೆಟ್ಟ ಅವಿಷ್ಕಾರ ಅಂದರೆ "ದುಡ್ಡು....."
ಅದು ಸಂಬಂಧ, ಪ್ರೀತಿ, ಸ್ನೇಹ, ವಿಶ್ವಾಸ ಇವನೆಲ್ಲವನ್ನು ಹಾಳು ಮಾಡುತ್ತದೆ.
೧೨. ಜೀವನದಲ್ಲಿ ಹೇಗಾದರೂ ಸರಿಯೇ,
ಬರೀ ಗೆಲ್ಲಬೇಕು ಎಂಬ ಭ್ರಮೆ ಬೇಡ.
ನಮ್ಮನ್ನು ಅನುಸರಿಸುವವರು ನಮ್ಮ
ಸಾಧನೆಯನ್ನು ಅನುಸರಿಸುವುದಿಲ್ಲ
ಬದಲಾಗಿ ನಾವು ತುಳಿದ ಹಾದಿಯನ್ನು ಅನುಸರಿಸುತ್ತಾರೆ.
೧೩. ಸದಾ ಶ್ರೇಷ್ಠ ಚಿಂತನೆಗಳಿಂದ ಮನಸ್ಸನ್ನು ತುಂಬಿ.
ಸೋಲನ್ನು ಲಕ್ಷಿಸಬೇಡಿ.
ಹೋರಾಟ ಮತ್ತು ತಪ್ಪುಗಳ ಲೆಕ್ಕ ಇಡಬೇಡಿ.
ಸಾವಿರ ಸಲ ಸೋತರೂ ಮತ್ತೊಮ್ಮೆ ಪ್ರಯತ್ನಿಸಿರಿ.
೧೪. "ಬೆಳಕಿಗೋಸ್ಕರ ಮೈಸುಟ್ಟುಕೊಂಡ ಬತ್ತಿ ಯಾರಿಗೂ ಕಾಣಿಸಲಿಲ್ಲ".
ಆ ಬೆಳಕಿಗೋಸ್ಕರ ಅಸ್ತಿತ್ವವನ್ನೇ ಕಳೆದುಕೊಂಡ ಎಣ್ಣೆ ಯಾರಿಗೂ ಕಾಣಿಸಲಿಲ್ಲ.
ಆ ಬೆಳಕಿಗೋಸ್ಕರ ಆಶ್ರಯ ಕೊಟ್ಟ ಹಣತೆ ಯಾರಿಗೂ ಕಾಣಿಸಲಿಲ್ಲ.
ಹಾಗೆಯೇ ಜೀವನ, ಕೆಲವು ಸಲ ನಮ್ಮ ಶ್ರಮ ಇನ್ನೊಬ್ಬರ ಖ್ಯಾತಿಗೆ ಕಾರಣವಾಗುತ್ತದೆ.
೧೫. ಖುಷಿ, ಸಂತೋಷ ಎನ್ನುವುದು ಪ್ರತಿಯೊಬ್ಬ
ವ್ಯಕ್ತಿಯ ಒಳಗಿರುವ ಅಕ್ಷಯ ಪಾತ್ರೆ
ಅದು ಎಂದಿಗೂ ಬರಿದಾಗುವುದಿಲ್ಲ.
ತನ್ನಲ್ಲಿರುವ ಖುಷಿಯನ್ನು ಇತರರೊಂದಿಗೆ
ಹಂಚುವ ಮೂಲಕ ಇನ್ನೊಬ್ಬರ ಮೊಗದಲ್ಲೂ
ಆ ಸಂತಸವನ್ನು ಕಾಣಬಹುದು.
೧೬. ಜನ ನಡವಳಿಕೆಗಳನ್ನು ಓದಿ ಕಲಿಯುವದಕ್ಕಿಂತ
ನೋಡಿ ಕಲಿಯುವುದೇ ಜಾಸ್ತಿ.
ಆದ್ದರಿಂದ ನಡೆ ಮತ್ತು ನುಡಿ ಸಂಸ್ಕಾರಕ್ಕೆ ಮಾದರಿಯಾಗಿರಲಿ.
೧೭. ನೊಣಗಳು ನಮ್ಮ ದೇಹವನ್ನು ಬಿಟ್ಟು
ಗಾಯದ ಮೇಲೆಯೇ ಕುಳಿತುಕೊಳ್ಳುವ ಹಾಗೆ,
ಕೆಲವರು ನಮ್ಮಲ್ಲಿರುವ ಸದ್ಗುಣಗಳನ್ನು
ತಳ್ಳಿಹಾಕಿ ಲೋಪದೋಷಗಳನ್ನು ಮಾತ್ರ ಹುಡುಕುತ್ತಾರೆ,
ಚಿಂತಿಸದಿರಿ ಹುಡುಕುವವರು ಹುಡುಕಿಕೊಂಡು ಇರಲಿ
ನಮಗೆ ನಮ್ಮತನದ ಅರಿವಿರಲಿ,
ನಮ್ಮ ಅಂತರಾಳ ಯಾವಾಗಲೂ ಒಳ್ಳೆಯದು ಬಯಸಲಿ.
೧೮. ತಪ್ಪುಗಳನ್ನು ಮಾಡಬಾರದೆಂದು ಗೊತ್ತಿದ್ದರೂ
ತಪ್ಪುಗಳನ್ನು ಮಾಡುತ್ತಿರುತ್ತೇವೆ ಆದರೆ
ಒಳ್ಳೆಯ ಕೆಲಸ ಮಾಡುವಾಗ ಅದು ಸರಿ ಎಂದು ಗೊತ್ತಿದ್ದರೂ
ಹಲವು ಬಾರಿ ಆಲೋಚಿಸುತ್ತೇವೆ.
೧೯. ಬೆಲೆ ಕಟ್ಟಲು ಸಾಧ್ಯವಿಲ್ಲದ್ದನ್ನು ಮಾರಲು ಸಾಧ್ಯವಿಲ್ಲ.....
ಬೆಲೆ ಕಟ್ಟಲಾಗದ್ದು "ಮತ, ಮಾತೃ, ಗೆಳೆತನ ಮತ್ತು ಧರ್ಮ".
೨೦. "ಹುಟ್ಟಿದಾಗ ಜಾತಕ",
"ಮಧ್ಯದಲ್ಲಿ ನಾಟಕ",
"ಸತ್ತಾಗ ಸೂತಕ"... ಆದರೂ ನಿಲ್ಲಲ್ಲ ಜನರ ಮಾತಿನ ಕೌತುಕ,
ಬರೀ ಕಣ್ಣಿಂದ ನೋಡಿದ್ರೆ ಎಲ್ಲರಲ್ಲೂ ದ್ವೇಷ ಕಾಣುತ್ತೆ,
ಒಂದು ಸಲ ಹೃದಯದಿಂದ ನೋಡಬೇಕು ಜಗತ್ತೇ ಸುಂದರವಾಗಿ ಕಾಣುತ್ತೆ.
೨೧. ಬಯಕೆಗಳು ಕಡಿಮೆ ಇದ್ದಾಗ
ಕಲ್ಲು ಬಂಡೆಯ ಮೇಲೆ ಮಲಗಿದರೂ
ಹಿತವಾದ ನಿದ್ರೆ ಬರುತ್ತದೆ, ಬಯಕೆಗಳು
ಹೆಚ್ಚಾದಾಗ ನಯವಾದ ಹಾಸಿಗೆ ಕೂಡ ಚುಚ್ಚುತ್ತದೆ.
೨೨. ನಾವೆಷ್ಟೇ ಎತ್ತರವಿದ್ದರೇನು ನಾಳೆಯನ್ನು ನೋಡಲಾರೆವು,
ಸಂತೃಪ್ತಿಯಿಂದಿರೋಣ. ಜೀವನವನ್ನು ಆರಾಮವಾಗಿ
ತೆಗೆದುಕೊಳ್ಳೋಣ ಏಕೆಂದರೆ ಜೀವನ ಬಲು ಚಿಕ್ಕದು.
೨೩. ಪ್ರಪಂಚದಲ್ಲಿ ನಾವು ನಂಬಿರುವ ದೇವರುಗಳು ಕಲ್ಲಾಗಿರಬಹುದು,
ಆದರೆ ಅವುಗಳನ್ನು ಪೂಜಿಸುವ ನಮ್ಮ ಮನಸ್ಸುಗಳು ಕಲ್ಲಲ್ಲ,
ಬದುಕು ನಂಬಿಕೆಯ ಕೈಗನ್ನಡಿ.
೨೪. ದಂಡಿಸೋ ಅವಕಾಶ ಇದ್ದರೂ ದಂಡಿಸದೇ
ಇರುವುದನ್ನು ಸಹನೆ ಎನ್ನುತ್ತಾರೆ,
ತಪ್ಪು ಮಾಡೋದಕ್ಕೆ ಬೇಕಾದಷ್ಟು ಮಾರ್ಗಗಳಿದ್ದರೂ
ತಪ್ಪು ಮಾಡದೇ ಇರುವುದಕ್ಕೆ ವ್ಯಕ್ತಿತ್ವ ಎನ್ನುತ್ತಾರೆ.
೨೫. ಯಾರ ಮೇಲು ಅಥವಾ ಯಾರನ್ನೋ
ನೆನಸಿ ಕಣ್ಣೀರು ಯಾವತ್ತೂ ಸುಮ್ಮನೆ ಬರಲ್ಲ,
ಅದು ಕೇವಲ ನಮ್ಮ ಆತ್ಮೀಯರಿಗೆ ಅಥವಾ
ನಮ್ಮ ಜೊತೆ ಒಂದು ಅವಿನಭಾವ ಸಂಬಂಧ
ಇರೋರಿಗೆ ಮಾತ್ರ ಸಾಧ್ಯ. ಅಂತಹ ಸಂಬಂಧವನ್ನು
ಯಾವತ್ತು ಕಳೆದುಕೊಳ್ಳಬಾರದು
ಅದು ವ್ಯಕ್ತಿ ಅಥವಾ ವಸ್ತುವೇ ಆಗಿರಲಿ.
No comments:
Post a Comment